8月19日, 星期日, 雨, 33度

今朝好早就起左身啦, 因為發左兩個好差既夢:
第一個: 係講我同全個家族去左印度旅行(唔知點解去印度), 開頭玩得好開心, 之後我去左洗手間, 去緊果陣聽到一d聲, 不過我冇理佢, 之後出返去, 發現d屋企人死哂, 我重比龍捲風吹走左....醒返已返到香港, 之後我就要去準備所有人既身後事, 個種感覺好辛苦好難受.
第二個:係講我同妹妹因為一d事, 已經唔再係朋友.....但係真係唔知咩事(唔通我個心係咁諗)..

不過第一個夢咁差我都冇醒, 竟然響第二個夢我就醒左啦, 重.....成身汗添......咩事呢, 邊樣緊要d呀!

之後我就去左食早餐重買左報紙, 星期日一個人咁去食早餐, 個感覺都唔錯, 唔通我真係適合一個人?! 之後返到屋企, 行下, 睇下電視, 就夠鐘出門口啦.

今日係我第三次返教會, 亦係第一次咁聽人講道, 完完全全好似上左一課"中外歷史" 咁, 個感覺都好奇怪, 冇之前果d咁. 不過我都好比心機聽, 好快就過左個幾鐘啦. 出到門口, 一轉身就比我見到妹妹& uncle, 我地之後就去左食野, 之後就去左魚街買d野, 重記得上次黎, 去到果間舖頭, 果個人打左兩次比妹妹, 重send 下msg黎, 時至今日, 竟然好平靜喎, 都好既.唔駛我諗咁多.

買完之後就上左妹妹屋企, 見到原本放相既地方已經冇相啦, 真係好唔開心嫁, 但係我忍住冇講出聲問, 亦唔好意思問d相係咪已經掉哂. 之後我地再次傾左好多野, 有希望的亦有失望的. 我知道大家都有一個時間響度諗既,真係睇下邊個快d 諗得通啦... 其實我好多次都問自己, 係咪應該.......定係........呢, 連我自己都答唔到, 好多野, 真係盡在不言, 響我既歌已經講哂.唉.....

傾到7點幾, 我地去左食一個不錯的晚餐, 又傾下玩下, 真係幾開心嫁, 食完之後, 我地再去行左陣街就上返去啦, 繼續做我今日要做, 但係未做既野, 就係洗籠, 洗洗下, 我問, 乜妳個電話今日咁靜既? 不過唔知係聽唔到定唔答. 我重記得妳講過, 比人話妳拖泥帶水, 我真係好想知, 關佢地咩事囉....唉...

之後我地睇左一陣電視, 妹妹響醫個時候, 已經再次響我身邊訓著左啦, 醫種熟識既感覺, 醫種舒服既氣氛, 令我醫40幾日黎.....響醫個時間, 第一次覺得好眼訓. 我當然好想響度訓一晚啦, 不過今時唔同往日啦, 想係可以既, 但係會被拒絕囉, 所以我覺得應該係決斷d咁走. 唔好拖啦, 唔好要大家難做啦.....

上到車, 妹妹打比我, 問我做咩, 叫我唔好唔開心, 我反問:"有咩可以令我好開心呢?" 當然冇人可以答到我啦. 唔通我可以話, 我地重可以keep 住醫種"似是而非, 欲拒還迎", 可以令我開心嗎?

返到去帶完狗狗就開始打日記啦, 上左msn, kh話今日響旺中見到我, 不過太多人叫我但係我聽唔到, 世界真係小小小.....重話咁咪幾好囉, 我就覺得兩睇啦......咩係好, 咩係唔好都未知呀...

今日真係令我感覺到好多野, 令我哭笑不得, 悲喜不分. 好期待日後既每分鐘可以更好. 之前講我既愛情篇要絕筆, 但係我真係放唔低呀....點算!!

完.